إحنا نازلين تاني الميدان .......... ليه يا مخربين

إحنا نازلين تاني الميدان .......... ليه يا مخربين

كتب : طارق الكرداوى
أيوة علشان زهقنا .. الثورة غيرت إيه ممكن أعرف ؟؟
غيرت اسم مدرسة .. اسم شارع .. اسم قطاع .. لأ فعلا و الله و عملوها الرجالة
إنتا بتضحكوا على مين ؟؟
هو الشباب اللي ماتوا و غيرهم اللي انضموا لقائمة معاقين كان بس علشان نغير اسم مدرسة و شارع ... !!!!!!
إنتو عايزين تقنعونا إن دي هي إنجازات الثورة ؟؟ !!!! بها و نعمة

إوعوا تفتكروا إن الكباش اللي إنضحى بيها لتهدئة الرأي العام هي الحل
العادلي و عز و جرانة و غيرهم مش أكتر من قربان إتقدم للإلتفاف على الشعب
يعني بمعنى أصح إحنا في نظرهم رموا لنا عضمه نتلهي فيها لحد ما يرتبوا ورقهم تاني
و يلموا ديلهم و يرجعوا لنا بزي جديد .. البلوزة و التنورة
يعني فين محاكمة اللامبارك و أسرته .. يعني إيه لما الدولة تتباع بالملاليم و الشعب يبات جعان و عريان ؟؟؟
أعرف ناس بتفرش ورق جرايد ع الأرض في عز الشتا من الفقر و الحاجة
مش عايزننا نبقى مكبوتين و هننفجر.. و سيادته في شرم و آخر دماااااااااااغ
و كمان آخر ورقة لتهدئة الرأي العام يقولوا لنا تحت الإقامة الجبرية لا و الله لسه فاكرين ؟؟!!!!!!!!!
طب و الله تحطوني معاه في شرم في الفيلا الأسطورية إياها دي و تجيبوا لي أكل من بره زيه
و أنا و الله موافق أبقى تحت الإقامة الجبرية و النووية كمان ..
إذا كانت الدنيا كلها عندي و تحت رجليا هخرج أنا للدنيا ليه ؟
لأ و كمان إيه ده أنا تحت حراسة مشددة نهار أبوها أسود الدبانة اللي تفكر تقرب مني
هو إنتوا بتستخفوا بينا أوي كده ليه ؟؟؟
هو إحنا كانت دي أحلامنا لما كنا بنبات في الميدان ؟؟؟
إنتوا عارفين الشباب المصري كان بيهتف بإيه بعد إعلان التنحي بلحظات ...
وحدة عربية واحدة .. وحدة عربية واحدة
الشباب المصري واعي و طموحه أعلى بكتير من تغيير إسم مدرسة و أعلى بكتير من إن سين يقوم من ع الكرسي أو يروح حتى الحمام
إحنا بنحترم الجيش جدا و بنحب الجيش حب بدون حدود و دي حقيقة
بس مش قادرين نفسر حالة العجز و السكوت دي مش لاقيين لها تفسير بجد
و كل شوية بيتلعب علينا لعبة شكل
شوية .. الإستقرار و لبانة الإستقرار .. و شوية دخلنا في هوجة التعديلات الدستورية ..
و موقف الإعلام السخيف و المخزي منها و تسمع ده يقول نعم و ده يقول لأ و كل واحد بيتكلم في وادي
و ناس مش عارفة أصلا ليه نعم و ليه لأ و بتصوت و خلاص
و فتاوى كمان غريبة و عجيبة من نوعها
سيبكوا إنتوا من البهوات بتوع الفتاوى الحمضانة اللي ملوا دماغ الناس بيها
و يقولك أصل دي علشان المادة التانية من الدستور
لا و الله .. يا فرحتي بيكم .. ما تبطلوا سذاجة بقى
هي فين المادة التانية اللي بتتكلموا عنها دي أصلا
واحد يقولك أيوة دي بتقول إن الشريعة الإسلامية هي .... ما تكملش يا مفتح
هي فين أصلا الشريعة الإسلامية دي إحنا هنضحك على بعض
المادة التانية من الدستور مادة يعلوها التراب و لم تقربها يد لامس من أول ما اتوضعت أصلا
ولا هو إحنا دايما بنجري ورا أي حاجة خضرا و خلاص
يعني نعم و لأ مالهاش أي علاقة من قريب أو بعيد بالمادة التانية
لأن ببساطة شديدة التصويت على التعديلات كان في مصر مش في مكة ما تفوقوا بقى من الهذيان بتاعكم ده
ال يعني كان فيه أصلا شريعة و هتتغير بقى

و شوية و لعبة تانية يقولك البورصة و إشتروا في البورصة و مصر هتخرب
يا عم تولع البورصة على الأسهم اللي فيها هي البورصة دي كانت بتاعة الشعب ؟؟؟
البورصة يا بهوات عبارة عن أسهم الحرامية و النصابين اللي شفطوا البلد طول 30 سنة
و لما إنتوا تجروا تشتروا زي ما هما عايزين يبقى كده في الجون
هما خدوا فلوسهم و فين طريق المطار ؟؟؟؟؟؟؟؟؟؟؟؟؟
مش بقول ما تشتروش لأ بالعكس اشتروا
بس الأول كنتوا حاسبوا الحرامية قبل يلموا فلوسهم بمشاركة إعلامية هزيلة و يطلعوا الطيارة
طب ممكن سؤال سؤالين بس معلش ع الماشي
الشركات اللي كان لها أسهم في البورصة وقفت ؟؟
شركات الحديد و الأسمنت اللي مبيعاتها ضاربة في السما بسبب حركة البناء التي تشهدها مصر قفلت ؟؟؟
مثلا يعني لو حبينا نصدر و لا نستورد هيقولوا لنا لأ أصل بورصتكم كلووووزد ؟؟؟
يطلع واحد تاني ناصح يقولك لأ أصل البورصة لما تقع ..
أيوة .. حضرتك أنا معاك أهو كمل يا فهامة يا علامة يا اللي مفيش منك إتنين كمل ده إنت فَلته
لما تقع البورصة هنتشطب من مؤشر معرفش إيه و من منظمة إيه العالمية
و ده معناه إنهيار إقتصادي . وووووووووووووااا .. لا بجد وقعت قلبي
بردو لسه بتصدقوا إن الشمس بتطلع من الناحية التانية
المستثمر يا سيدي الفاضل بيبص لحاجة واحدة بس .. أحط هنا جنيه آخد منه جنيه
يعني لما ييجي يستثمر في مصر مش هيحط إيده فوق عينه علشان الشمس بتزغلل
و يبص من بعيد على المؤشر لو لقى الأمبير فوق يبقى يدخل مصر و لو لقاه تحت ياخد التوك توك بتاعه و يطلع ع البلد اللي بعدها
مصر لو فيها ناس إيدها نظيفة و ضميرها صاحي و الله كنا زماننا دلوقتي من أغنى دول العالم
لأن الإستثمار و الجذب الإستثماري في أي مكان حتى بلاد واق الواق بيتعلق بصفة أساسية جدا بموارد الدولة
و الدليل على كده إن دول كتير مستقرة و فيها بورصة و مع ذلك فقيرة لأن رصيدها من الموارد أصفار
يعني مثلا لما تكون حدودك بتطل على 2 بحر و عندك قناة بيمر فيها 40 % من حجم تجارة الكوكب اللي بنعيش عليه و عندك نيل و أراضي زراعية من أجود الأراضي الزراعية في العالم و عندك تاني أكبر إحتياطي للغاز في العالم و عندك بترول و مناجم ذهب و فوسفات و معادن و عندك طاقة شمسية و سد عالي و محطات توليد طاقة و عندك عمالة رخيصة بقى في حد عاقل بعد كل ده يقول أصل المؤشر الفلاني و منظمة بيب و تيت .. يا مرارتي اللي هتتفقع
البورصة دي يا أساتذة لعبة يهود و اللي مش عارف فيكم كده يفتكر السقطة الرهيبة لنمور آسيا في التسعينيات كان مين وراها ؟؟ م الآخر هي معمولة للعب بالعقول و بس

طب يا بني إنت وهو إعقلوا و خلوا البلد تستقر

هو حضرتك إيه علاقة إستقرار البلد بإنكوا تحاكموا الحرامية و قتالين القتله اللي فيها
هو مش من دعائم الإستقرار القضاء على الفساد و المفسدين
إنتوا عارفين ليه مفيش إستقرار و لا هيبقى فيه ؟؟؟
لأنه ببساطة شديدة في مفسدين قاموا من ع الكراسي ( بس على فكرة هما راجعين تاني ما هو في بدل سين في صاد و بدل أحمد فيه الحاج أحمد و بدل الحزب الواطي اللي مزعلكم نغير إسمه و بالعند بقى هنسميه الحزب العالي الديموقراطي ) المهم نرجع لكلامنا في مفسدين حلو .. ها ... و في ناس بتقول نحاسبهم .. كلام جميل خالص .. و إيه كمان ؟؟
في بقى ناس تانية تبع المفسدين دول بس لابسين لبس الثورة بيقولك العقل و المنطق و الإستحمار .. إيه .. هو أنا قلت .......... لأ أنا أقصد الإستقرار يعني الإستقرار
طب يا خوي و الله أنا كمان عايز إستقرار بس إيه علاقته لما أقول لك حاكم واحد قتل و واحد نهب و واحد سرق مش فاهم ؟؟؟؟
إيه علاقته لما أقولك رجع لنا فلوسنا اللي نصيب كل واحد مننا فيها 187 ألف جنيه
يعني إيه لما اللي قعد 30 سنة يسرق في البلد و ينهب فيها يروح يقعد في شرم و ياكل أكل مستورد و كمان تحت الحماية !!!!!!!!!!!!!
طب لما بتعملوا كده في اللي سرق و قتل يبقى اللي ما سرقش يتعمل له إيه هه .. هه
تطلعوهم على حسابكم عمرة و حج صح ؟؟؟؟؟؟؟
طب إحنا شعب طيب و قنوع و مش هنيجي ناحيته بس ممكن تودوا ال 80 مليون يقعدوا معاه في شرم .؟؟؟ ما هو يا نعيش عيشة فل ...
هي مش البلد دي بتاعتنا كلنا بردو و لا أنا فاهم غلط ؟؟؟
يعني إيه لما السخافة و الإستخفاف يوصل إن اللي يتمسك في الشارع بمطواة ياخد 5 سنة .. يا بلاش و بمحاكمة عسكرية .. ألاأونه .. ألاتريه .. حلال عليك الخمس سنين يا ابني
لكن اللي قتل له 1000 و لا إتنين من زهرة شباب مصر و حسر 80 مليون عليهم ده .. لا لا
نحاكمه مدني و تأجيل في التاني في التالت و نام إنت بس يا شعب و إطمن و إحنا مش هنسكت أبدا .. دم الناس دي مش هيروح هدر ناموا إنتوا بس ناموا
و شوية و تتنسي المحاكمة و اللي بيتحاكموا و اللي بيحاكموا كمان
و الله يرحم الناس اللي ماتت .. قضاء و قدر .. إيه إنتوا مش مؤمنين و لا إيه يا ولاد ال.............. إعترضوا بقى على قضاء ربنا إعترضوا
و مش بعيد بعدها يطلع واحد من من بتوع .. فتوى مقابل فرخة .. يقول لك إن طلب محاكمة اللي قتلوهم ده نوع من أنواع الإعتراض على قدر الله في الأرض و ده كفر و رِدة و دقيق بالرَده و عيش فينو كمان

طب و إيه كمان يا ولاد هاااااااااااا

تشوف بقى الإعلام النزيه الشريف الحيادي اللي ينقط و يخلي الشعب كله عايز يطلع ع المقطم و يرمي نفسه من فوق .. الشاشة المصرية الساطعة الملوثة باللون الأحمر لون دماء زهرة شباب مصر اللي الإعلام كان يد من الأيادي الملوثة بدماءهم

مش ده الإعلام اللي كان بيقول عليهم عملاء و خونة و جواسيس و كان معاهم ناس من المريخ و زحل و إتصلوا على ناس جلهم من خارج درب التبانة خالص ( و ده تطور خطير طبعا في كثافة سكان الأرض و مخالفة صريحة لمبدأ أنا و ابن عمي ع الغريب نضرب في بعض إيه إحنا ولاد كوكب واحد لكن يجيبوا حد من بره كده عييييييييييييييب يا ولاد )
التليفزيون اللي لما كانت الناس بتنداس بالجمال و البغال البشرية و الحيوانية في الميدان كان سيادته بيصور لنا الحبّيبه اللي على كوبري قصر النيل و اللي ماشيين حلوين إتنين إتنين و الإيد في الإيد و بيقولنا إن الحياة بييييييييييس خالص في التحرير و مفيش أي حاجة
الإعلام اللي كان بيقول جايين بأجندات خارجية و كراسة الأول و بت باي بوي لسه هو هو الإعلام العميل بقياداته و سياسته القذرة اللي مش عايزة تتغير

يا فرحتي لما تشيلوا ابن الفقي .. طب و جبتوا مين ؟؟؟؟

طب و البطانة اللي تحت و القيادات اللي راشقة في الكراسي
كذابين الزفة و المطبلاتيه و أرجوزات النظام السابق اللي كانوا أبطال أكبر عرض للمابيت شو عرفه التاريخ السياسي .. أوسكار و بإكتساح و بلا منافس
الفيلم المصري الوحيد و الفريد من نوعه إنتاج الإعلام المصري فيلم الموسم ( إحنا معاك يا ريس ) اللي اتغيربعد الثورة لـ ( إحنا مع الناس التانيين ) طبعا بعد الثورة كل حاجة بتتغير
و تشوف بقى الأرجوزات اللي كانت بتعيط يا حبة عيني على البابا اللامبارك و على مصر و بيشتموا في شباب الثورة و التحرير و يالهوي بقى على العياط و الدموع ( يا بخت شركات المناديل ) .. مصائب قوم عند قوم فوائد .. لما تلاقي الأرجوزات دول طالعين تاني ع الشاشات و بيتكلموا و بيمدحوا في الثورة و في الشباب .. يخرب بيوتكم إنتوا إيه مالكمش مله ؟؟
يعني نمسك الشباشب و نقعد نضرب فيكم ... موتوا بقى إنتوا ما بتموتوش و لا إيه ؟؟
بس مش بينضحك علينا .. ده أسلوب تلميع إعلامي علشان الأرجوزات دي هي اللي النظام هيستخدمها للرجوع .. يعني دول كوبري م الآخر و شوية و هتلاقوا وجوه جديدة بتتكلم في السياسة و الفترة المقبلة و الأشكال دي هما اللي بيستضيفوهم و طبعا معروف ما هم مش هيستضيفوا حد غير الدفعة الجديدة من على بابا و الأربعين حرامي ( الحزب التيييييييييت .. الوطني سابقا )

طب يعني إيه لما الإعلام شغال حرايق بين أطياف الشعب و بين الأحزاب و الناس اللي قالت هتترشح ..
يعني إيه لما الإعلام مش بيعبر نهائي عن صوت الشعب .. مش بيعبر عن حالة الغضب و السخط من الناس اللي قتلوا القتيل و من النداله حتى ما مشيوش في جنازته و لسه بيتفسحوا في البلد بمنتهى البجاحة و الإستفزاز

يعني إيه لما التلفزيون و الإعلام يبقى جزء من الثورة المضادة بسبب وجود ديول النظام .. و في نفس الوقت هو معانا .. أيوة بيعترف إن في ثورة مضادة .. و ده جزأ من الثورة المضادة و هو الإعتراف بها .. يا سلاااااااااااام ما هم إتغيروا أهو
يعني إيه لما الإعلام و بطريقة واضحة جدا و مفقوسة و مكشوفة و بايخة و عامله زي طريقة المخبر البايت بتاع الجورنال المخروم و البالطو الأسود
تلاقيه في مداخلاته الهاتفية و مقابلاته للجمهور في الشارع بيوصل نفس الأصوات العميله علشان يلعب علينا تاني ..
يا ترى ممكن نعمل حملة ع الفيس بوك لمقاطعة الإعلام المصري لحد ما يتغير ؟؟ ممكن ؟؟

طب و إيه كمان من إنجازات الثورة ؟؟

اللامبارك في شرم هو و علاء و جيمي و بوزي اللي خربتها
حرب شعواء لتغيير أسماء المدارس التي تحمل اسمه أو المودام .. لأ جامدة دي أوي .. تغيير فعلا
حامل المطواة يتحاكم عسكري و اللي قتل .. مدني .. و كمان تأجيل
اللي يسرق موبايل يتحاكم عسكري .. و اللي يسرق شعب .. مدني .. و كمان تأجيل
إيه التناقض الغريب و المستفز ده
معلش ما هو إحنا مش ذنبنا كشعب إن مبارك و حاشيته ماشيين دلوقتي من غير مطاوي
ماهو لو كان معاهم مطاوي كنتوا حبستوهم صح ..؟؟؟؟؟
أووووووووووف ... شعب منحوس دايما .. يعني دلوقتي بس يرموا المطاوي
عودة فلول الحزب الواطي للإجتماع و التخطيط لخوض الإنتخابات البرلمانية القادمة ( و ما تنسوش فيه أحمد و الحاج أحمد و كمان شفيق لو مش عاجبكم )
يعني إيه لما ثورة تقوم إعتراضا على حزب واطي و بعدين يترك الحزب و أعضاؤه في كل مكان بيمارسوا قذارتهم و بيخططوا و يدبروا ( هي دي الديموقراطية )
بقاء رؤوس النظام التي قام ( برشئها ) في كل مصيبة في البلد سياسيا و إقتصاديا و إعلاميا و في الجامعات و الهيئات و المؤسسات حتى في شركات النظافة كمان
من إنجازات الثورة كمان إنه قام من ع الكرسي .. بس لسه معاه موبايل و عنده نت و يقدر يحرك ديوله في كل مكان

إنتوا عايزين إستقرار ؟؟ عايزين المطالبات الفئوية اللي بيحركها ديول النظام تتوقف و المظاهرات تنتهي ؟
بجد أول الإستقرار إقامة دولة العدل
مش دولة إذا سرق فيهم الشريف تركوه و إذا سق فيهم الضعيف أقاموا عليه الحد لأن دي أول الدول اللي بتخرَب
بطلوا مسكنات .. السرطان لازم يبتر من جسد مصر
طول ما الناس دي بره و ما اتحاكمتش طول ما ايدهم القذرة مش هتبطل لعب في مصير 80 مليون فرد
لو عايزين الإستقرار بجد يبقوا تبطلوا تباطؤ ... التباطؤ قد يفهم أنه تواطؤ